Link açıqlığı

Kreml kontrol etken Aqmescit rayon mahkemesiniñ qırımtatar milliy areketiniñ liderlerinden biri İlmi Umerovnıñ davası boyunca oturışında advokat Nikolay Polozovnı sorğuğa çekmege planlaştıralar.

Bunı İlmi Umerovnıñ qızı Ayşe Facebookta bildirdi.

Polozov İlmi Umerov davasınıñ advokatı olğan edi. Qırımnıñ Yuqarı mahkemesi fevralniñ 14-de advokat Nikolay Polozovnıñ Aqmescitniñ Kiyev rayon mahkemesiniñ qadısı Viktor Mojelânskiyniñ Rusiye FSB taqiqatçısı İgor Skripkağa onı «Umerov davasınıñ» şaatı olaraq sorğuğa çekme qararından bergen şikâyet arizasını red etti.

Birinci instantsiya mahkemesiniñ qararı deñiştirilmedi. Böylece, Qırım Yuqarı mahkemesi yanvarniñ 25-de FSB hadimleri tarafından Polozovnıñ tutulmasını qanunğan uyğun dep tanıdı. Advokatnıñ özü ise onı qaçıruv olaraq tasnif etken edi.

Polozovnıñ çetleştirilmesi «Umerov davasınıñ» esnasında mahkeme oturışlarınıñ ketişatına tesir ete bile. Böyle bir fikirni Qırımtatar Milliy Meclisiniñ reis muavini İlmi Umerov seslendirgen edi.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı. Er afta çarşenbe künleri mahkeme oturışları olacağı haber etile.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.


XS
SM
MD
LG