Link açıqlığı

Qırımda prokuror «Qırım diversantları davasınıñ» mabüsi eki yılğa azatlıqtan marum etilmesini istey


Redvan Suleymanov

İşğal etilgen Qırımda avgustnıñ 2-de olıp keçken mahkemede prokuror «Qırım diversantları davasınıñ» mabüsi Redvan Suleymanovğa 2 yıl apis cezası berilmesini talap etti. Bunı advokat Emil Kürbedinov haber etti.

«Munaqaşada qabaat tarafı Suleymanovnıñ qabaatı bütünley isbatlanğan, dep bildirdi. Deñiz keçiti ve Aqyar avtovokzalına 3,5 mln rubleden ziyade (tahminen 1,5 mln grivna) zarar ketirilgen eken. Men ise zarar ketirilgenini isbatlağan bir delil olmağanını, er şey tahminlerge esaslana, dep qayd etti. Mahkeme keçken oturışta taqdim etken malümatıma emiyet bermedi. «Morskaya direktsiya» şirketiniñ maliye-hocalıq faaliyetinde yaqında bozuvlar oldı, belki de, Suleymanovğa qarşı aytılğan o 3 mln bozuvlar neticesinde olğan», – dep tarif etti Qırım.Aqiqatqa Emil Kürbedinov.

Advokatnıñ aytqanına köre, Suleymanovnıñ soñki sözü avgustnıñ 7-ne avuştırıldı.

Redvan Suleymanov 2016 senesi Siyülniñ 30-da Aqmescit ava limanında yaqalanğan edi. Avgustnıñ 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.

«Qırım diversantları davasınıñ» mabüsi Redvan Suleymanov mahkemede qabaatını tanıdı, lâkin büyük zarar ketirgeninen razı olmadı, dep haber etilgen edi.


XS
SM
MD
LG