Link açıqlığı

Halqara Tamır halqları Künü munasebetinen avgustnıñ 9-nda Ukraina Haber siyaseti nazirligi, Qırımttar Milliy Meclisi ve Amerika Evi tantanalı surette Kyivde «Qırım aqşamı» merasimini ötkerecekler. Bu aqta ilân avgustnıñ 2-nde Ukraina Haber siyaseti nazirliginiñ web-sitesinde derc etilgen.

Teşkilâtçılar qırımtatar yır ve oyunlarınıñ kontserti teşkil olunacağı, qırımtatar halqınıñ etnogenezi, tarihı ve medeniyeti aqqında sergi taqdim etilecegini beyan etti. İngliz tilinde taqdim etilecek bu sergi Estoniya Tışqı işleri nazirliginiñ desteginen İnsan aqları boyunca Estoniya institutı, Ukraina Haber siyaseti nazirligi (HSN), Qırımtatar Maaliy Merkezi tarafından azırlanılğan.

«Şimdi işğal şaraitinde yaşağan Ukrainanıñ tamır halqınıñ medeniyetinen tanıştırmaq içün, Ukrainada çalışqan bütün diplomatik müessiselerniñ vekillerini HSN bu merasimge davet ete», – dep haber etile.

Halqara Tamır halqlarınıñ Künü er sene avgustnıñ 9-nda qayd etile. Böyle bir kün BMT Baş Assambleyasınıñ rezolütsiyası ile 1994 senesi tain etilgen edi.

2014 senesi martnıñ 20-nde Yuqarı Rada qırımtatarlarnı Qırımnıñ tamır halqı olaraq tanıdı. Bu qararğa 283 deputat qoltutqan edi. Ukraina qırımtatarlarnıñ tamır halqı olaraq etnik, medeniyet, til ve din hususiyetleriniñ saqlap qalması ve inkişafını kefil etmege vade etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG