Rusiye köpür qurmaq maqsadınen Keriç keçitinde gemilerniñ yürüşini sıñırlağanı sebebinden Ukraina tarafından şikâyet azırlanılmaqta. Bunı İnfrastruktura naziriniñ muavini Yüriy Lavrenük avgustnıñ birinde limanlarnıñ zenaat ittifaqlarınen ötkergen körüşüvi devamında bildirdi, dep haber etile nazirlikniñ web-sitesinde.
«Bu meseleni şimdi Tışqı işler nazirligi, Milliy telükesizlik ve mudafaa Şurası ile birlikte çezemiz. Bu global, siyasiy ve mürekkep meseledir, amma biz onı mıtlaq çezermiz. Adliye nazirligi, Rusiyege qarşı açılğan davalar çerçivesinde Keriç kanalınıñ qapatılması ve gemiler içün yürüvniñ sıñırlamasınen bağlı meseleni ayırmaqta. Şimdi şikâyet azırlanıla, Mariupol ve Berdânsk ticaret limanlarına kelmegen sermiyalarnıñ zararı esaplanılmaqta», – dep beyan etti Lavrenük.
Bundan evel o bildirdi ki, Rusiye Naqliyat nazirligi 2017 senesi avgust-sentâbr aylarında 23 künge Keriç-Yeni Qale qısımında gemiler içün keçitni qapatmaq içün ferman leyhasını azırlağan.
Qırım Muhtar Cumhuriyetiniñ prokuraturası keçende bildirdi ki, Keriç keçitinde köpürniñ qurulmasınen tabiatqa ketirilgen zararnı ögrenmek içün mahkemeden ögüne taqiqat alıp barıla.
Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi. Köpürni 2018 senesine qadar qurmağa, 2019 senesi yazda işke tüşürmege vade etken ediler.
Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.
