Kreml kontrol etken Qırım Yuqarı mahkemesi 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni ve onı teşkil etkeni içün mahküm etilgen qırımtatar milliy areketi liderlerinden birisi Ahtem Çiygoznıñ davasına Qırımtatar Milliy Meclisiniñ reisi Refat Çubarovnıñ sorav malümatlarını ilâve etmedi. Bu aqta advokat Nikolay Polozov video muracaatında tarif etti.
«İmaye üküm çıqarılmasına mania olğan qabaat qararı tüzetilsin dep, onı prokurorğa keri qaytarmağa rica etti, bu muracaatı red etildi. Mahkeme Refat Çubarovnıñ sorav protokollarını qoşmağa razı olmadı, imaye Çubarovnı çağırmağa ya da sorav protokollarını ilâve etmege rica etken edi», – dep ayttı advokat.
Advokatnıñ bildirgenine köre, davanıñ mahkeme taqiqatı yekünlendi, munaqaşalar avgustnıñ 7-ne belgilendi.
Kreml kontrol etken Qırım Yuqarı mahkemesinde «Çiygoz davasınıñ» 150-nci mahkeme oturışı olıp keçti.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
