Link açıqlığı

Aqmescitliler şeer yolbaşçısınıñ istifası meselesinde rey bere


Rusiyege tabi olğan Aqşmescit şeeriniñ yolbaşçısı Gennadiy Baharev, onıñ istifağa yollanılmasına dair «şamata» beklenilgen olğanını ayta. Şeer sakinleriniñ fikirini bilmek içün o özü «Faal Aqmescit» web-sitesinde soravnıñ açılmasına teşebbüs etti. Bunı Baharev yerli jurnalistlerge bildirdi.

«Rey berüv neticelerine köre areket yapılacaq. Şimdilik bunı ayta bilem – cemaatçılıqnen ultimatum tarzında qonuşqanımızdan soñ bu büyük şamata köterilecegini beklegen edik. Böyle bir fikir kimseni taaciplendirmedi. Amma başqa adamlarnıñ da fikiri bar, ve biz onı ögrenmege istedik. İç bir hulâsa çıqarmağa kerek degil, şimdi daa erte. Niayetinde soñ qararnı cumhuriyet yolbaşçısı alacaq. Men er angi (qararnı – QA) qabul etem», – degen Baharevniñ sözlerini «Krıminform» derc etti.

Baharevniñ istifasına dair rey berüv «Faal Aqmescit» sitesinde iyülniñ 28-nde peyda olğan. Şeerliler bu meselede öz reyleri avgustnıñ 10-na qadar bere bile.

Qırımdaki kütleviy haber vastalarında soñ zamanda Aqmescit yolbaşçısınıñ istifası aqqında bildirüvler yer almaqta, amma bu malümat daa tasdiq etilmegen.

XS
SM
MD
LG