Bazar künü, iyülniñ 30-nda, Rusiye prezidenti öz devletiniñ deñiz flotına bu sene devamında 30 yañı gemi berilecegini vade etti. Bunı o Deñiz arbiy flotınıñ Künü munasebetinen (Sankt-Peterburgta) Admirallıqnıñ tantanalı qabul merasiminde beyan etti.
«Flotnıñ zemaneviy silalarnen donatılması ve arbiy gemilerniñ keyfiyetini arttırmaqnen bağlı başqa planlarımızğa da qattı riayet etecemiz», – degen Putinniñ sözlerini «İnterfax» yayınladı.
Putin, arbiylerge ve olarnıñ ailelerine bütün kerekli destek berilecegini qayd etken.
Rusiyede ve işğal etilgen Qırımda Deñiz arbiy flotınıñ Künü iyül ayınıñ soñki bazar kününde qayd etile. Ukrainada DAF Künü iyülniñ ilk bazar kününde qayd etile.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
