Rusiye Energetika nazirligi iyülniñ 28-nde, cuma künü bütün Qırımnı ışıqsız qaldırğan qazanıñ sebeblerini beyan etti. Rus nazirliginiñ matbuat hızmeti bildire ki, qazanıñ sebebi – avanıñ fevqulâde sıcaq arareti olğanı, elektrik aqımı avtomatik şekilde kesilgenidir.
«Krasnodar vilâyetiniñ cenübiy-ğarbiy energetik rayonında avanıñ fevqulâde qızması sebebinden VL-500 kV (ava ağları) acele söndürildi, bunıñ aqibetinde Qırımnı energiyanen teminlegen KVL 220 kV (kabel-ava ağları) elektriksiz qaldı», – dep bildire Rusiyeniñ nazirligi.
Rusiye Energetika nazirliginde, şimdiki vaqıtta ava ağlarınıñ köçürilmesi içün tamir işleri alıp barılğanı haber etile, vaziyetni «energetika naziriniñ muavini Andrey Çerezov şahsen nezaret etkeni» bildirile.
İşğal etilgen Qırım iyülniñ 28-nde bütünley ışıqsız qalğan. Bunıñ sebebi qomşu Rusiyeniñ Krasnodar vilâyetinde yüz bergen qaza eken. Elektrik aqımını ketirgen ağlarnıñ dörtü de qaza sebebinden kesilgen.
2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
