İstilâ etilgen Qırım «bütünley elektriksiz qaldı». Bunı iyülniñ 28-nde Kremlge tabi olğan Qırım Yaqarlıq ve energetika nazirliginiñ yolbaşçısı Vadim Belik bildirdi.
Onıñ sözlerine köre, bunıñ sebebi – qomşu Rusiyeniñ Krasnodar vilâyetinde olğan qazadır.
«Qırımda elektrik energiyası bütünley kesildi. Krasnodar vilâyetinde acele avtomatika çalıştı», – dedi Belik.
O dedi ki, şimdiki vaqıtta energetikler Qırımğa elektrik aqımını teminlegen dört ağnı tamirlemege tırışa. Işıqnıñ berilecek vaqıtını Belik aytmadı.
İşğal etilgen Qırımğa elektrik aqımını ketirgen ağlarnıñ dörtü de qaza sebebinden kesilgen.
2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
