Link açıqlığı

Rusiye ABD diplomatlarına qarşı sanktsiyalar ilân etti


Rusiye akimiyeti amerikalı diplomatlarğa Serebrânıy Bor yerindeki yazlıq evini ve Moskvadaki anbarnı qullanmağa yasaqlağan. Bunı Rusiyeniñ Tışqı işler nazirligi (MİD) bildire.

Kreml Beyaz Saraydan sentâbrniñ 1-ne qadar Rusiyede olğan diplomatlarnıñ sayısını 455 insanğa qadar eksiltmege talap etti. MİD beyanatında aytıla ki, Rusiye bu sıñırlamalarnı sertleştirmek te mümkün.

Bundan evel Rusiye prezidenti Vladimir Putin, Rusiye şimdilik Amerika tarafından qabul etilebilecek sıñırlamalarğa çıdamlı şekilde davranğanını bildirgen edi.

İyülniñ 27-nde Amerika Birleşken Devletleriniñ Senatı aman-aman bir ağızdan rey berip Rusiyege qarşı sanktsiyalarnıñ qabul etilmesini destekledi. Temsilciler Palatasından kelgen qanun leyhasına millet vekilleriniñ 98-i rey berdi, ekisi qarşı çıqtı.

Endi vesiqa Beyaz Sarayğa teslim etilgen, ABD prezidenti Donald Trump 10 kün devamında bu qanunnı imzalamalı ya da red etmeli.

Saylavlardan evel ve akimiyetke kelgen soñ Rusiye ile munasebetler tüzelmek mümkün olğanını beyan etken Trumpnıñ kelmesinden berli, bu qanun leyhası –tışqı siyasetke dair Kongress tarafından qabul etilgen eñ büyük qanun leyhası oldı. Şimdi bu saada Trumpnıñ areketlerini sıñırlağan şey – saylavlar devamında Rusiye tarafından Trumpnıñ ğalebesi içün qarışuv yapılğanı aqqında iddianıñ taqiqatıdır.

Qanun leyhasında aytıla ki, sanktsiyalarnıñ maqsadı – zan etilgen saylavlarğa qarışmaq avesligi, Ukrainağa yapqan ücümleri, Suriyedeki qanlı vatandaşlıq cenkinde akimiyet ordusına destek bergeni içün Rusiyeni cezalamaqtır.

Trump bu meselede veto aqqını qullanmağa istese, ABD Kongressiniñ eki palatası bu vetonı yeñebilecegi tüşünilmekte.

Putin endi defalarca Rusiyeniñ Amerikadaki saylavlarğa qarışqanını red etken edi. İyülniñ 27-nde ise Moskva yañı sanktsiyalarğa qarşı cevap tedbirlerini alacağını beyan etti, ve «memleketimizge nisbeten yapılğan yüzsüzlikni soñsuz çıdamaq mümkün degil» dep aytqan.

XS
SM
MD
LG