İşğal etilgen Qırımğa elektrik aqımını ketirgen dört ağnıñ episi qaza sebebinden kesilgen. Bu sebepten yarımada sakinleri elektriksiz qaldı.
Bundan evel, cuma künü, iyülniñ 28-nde istilâ etilgen Qırımnıñ yedi regionında küçli yel ve yağmur sebebinden bir sıra mesken yerler elektriksiz qalğan. Bu aqta «Krımenergo» şirketiniñ web-sitesinde haber etilgen edi.
Energetiklerniñ bergen malümatına köre, gece ava afatı sebebinden mesken yerlerde qaza yüz bergen yerlerde ışıq söngen. Ayrıca Bağçasaray, Saq, Aqmescit, Aqşeyh, Qurman ve İçki rayonlarınıñ bir sıra mesken yerlerinde ve Yaltanıñ bir qısımndaelektrik ağı bozulğan.
2015 senesi dekabr ayından başlap, Herson vilâyetinde elektrik direkleriniñ bozulmasından sebep, Qırımğa qıtaiy Ukrainadan elektrik aqımı toqtatıldı. Şimdiki vaqıtta Qırım özü çıqarğan energiya, Rusiyeden yarımadağa ketirilgen generator ve Rusiyeniñ Krasnodar vilâyetinden keçirilgen energo köpür ile elektriknen temin etile.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
