Link açıqlığı

Saatnıñ esas haberi

Aqyarlı «Hizb ut-Tahrir davasınıñ» mabüsi Zeytullayev bloger ve jurnalistlerni «esnasnıñ manasızlığını» tarif etmege çağırdı


Rostov-na-Donu şeerindeki (Rusiye) SİZOda tutulğan aqyarlı «Hizb ut-Tahrir davasınıñ» mabüsi Ruslan Zeytullayev bloger ve jurnalistlerni oña qarşı keçirilgen mahkeme esnasına diqqat ayırmağa çağırdı. Bu muracaatını advokatı Edem Semedlâyev Facebookta derc etti.

«Rica etem! Apellâtsiyama kelip, bütün esnasnı tarafsız aydınlatıñız, cinaiy iş ve bütün esnasnıñ manasız olğanına mümkün olğanı qadar diqqat celp etiñiz», – dep yazdı Zeytullayev.

Şikâyet arizası iyülniñ 27-de Moskva şeerindeki Yuqarı mahkemede baqılacaq, dep bildirdi advokat.

Rostov-na-Donu şeerindeki Şimal-Kavkaz bölge arbiy mahkemesi 2016 senesi sentâbrniñ 7-de Zeytullayevni «terrorist cemiyette iştirak etkeninde» qabaatlı olaraq tanıp, oña 7 yıl apis cezasını berdi. Rusiye prokuraturası Rusiye Yuqarı mahkemesiniñ bu qararına itiraz bildirdi ve dava tekrar baqılması içün kene Şimal-Kavkaz bölge arbiy mahkemesine qaytarıldı. Taqiqat organları Zeytullayevnıñ terrorist cemiyet iştirakçisi degil de, teşkilâtçı olaraq tanılmasını istey. Rusiye Ceza Kodeksiniñ bu maddesi eñ azından 15 yıl ve atta ömür boyu apis cezasına ketirmek mümkün.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG