Kreml kontrol etken Aqmescit rayon mahkemesi qırımtatar milliy areketiniñ liderlerinden birisi İlmi Umerovnıñ davasını avgustnıñ 2-de baqacaq. Bunı iyülniñ 27-de Umerovnıñ qızı Ayşe Qırım.Aqiqatqa bildirdi.
«Mahkeme kâtibi telefon etip, oturış 2-de saat 14.30-da olacağını haber etti. Sebebini aytmadı. Mahkeme saytındaki cedvelde oturışımız daa yoq. Advokatlarnen bağlandıq – olarnıñ da haberi yoq. Adiy rejimge avuştırılmasınıñ sebebi nenen bağlı olğanını aytıp olamayım», – dep qayd etti Umerova.
O, advokatnıñ aytqanına köre, «bunıñ kibi qararlar ancaq mahkemede ilân etile bile, çünki telefonda oturış aqqında haber etilmey», dep qoştı.
«Umerov davasınıñ» daa bir mahkeme oturışı vaqtında FSB taqiqatçısı sorğuğa çekilgen edi. Nevbetteki oturış iyülniñ 30-na belgilendi, dep haber etilgen edi.
İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.
2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.
İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.
