Kreml kontrol etken Qırım Yuqarı mahkemesinde iyülniñ 27-de 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni ve onı teşkil etkeni içün mahküm etilgen qırımtatar milliy areketi liderlerinden birisi Ahtem Çiygoznıñ sorğusını yekünledi. Bundan soñ taraflarnıñ munaqaşaları başlamalı, dep bildirdi Qırım.Aqiqatqa Çiygoznıñ advokatı Nikolay Polozov.
İmaye tarafı üküm 2017 senesi avgustnıñ soñunda – sentâbrniñ başında çıqarılacağını tahmin ete.
«Şimdilik diqqatımnı çekmegen bir şeyler peyda olmasa, avgustnıñ ekinci aftası – aynıñ 7-si-9-da – mahkeme üküm çıqarmağa ketecek. Mahkeme ükümni ne vaqıt çıqaracaq – bir afta, eki, üç ya da bir ay kerek – aytması zor. Bayağı delil tedqiq etiilgen edi, qadılar ükümniñ qarama şeklini azırlağan olsa da, bir yıl devam etken esnastan soñ eki künde üküm çıqarmağa doğru olmaz. Mence, üküm avgustnıñ soñunda – sentâbr başında ilân etilecek», – dep qayd etti advokat.
İyülniñ 25-de mahkeme Ahtem Çiygoznı sorğuğa çekmege başladı. Advokat Nikolay Polozovnıñ bildirgenine köre, birinci sorğu fevralniñ 25-de ve 26-da olıp keçken vaqialarnıñ tarihiy tarafları ve esaslarına bağışlandı. İyülniñ 26-da keçirilgen ekinci sorğuda ise Çiygoz 2014 senesi mitingniñ teşkil etmesinen oğraşmağanını ayttı.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
