Link açıqlığı

Novikov: qırımlı Çirniy Rusiyede türme rejimine keçirildi ve konsulnen körüşip olamadı


Yedi yılğa azatlıqtan marum etilgen qırımlı Aleksey Çirniy

Rusiyeli advokat İlya Novikov iyülniñ 26-nda, Rusiyede mahküm etilgen Ukraina vatandaşı, «Sentsov davasınıñ» mabusı Aleksey Çirniy artıq Bataysk apishanesinde umumiy rejimden türme rejimine keçirilgenini bildirdi. Bunı Novikov, Çirniyden kelgen SMS-mesajını faş etip, Facebookta bildirdi.

Onıñ sözlerine köre, apishane vekilleri Çirniyge degenler ki, o Rusiye vatandaşı olaraq tanılğanı sebebinden ukrain konsulınen artıq körüşip olamaycaq.

Advokatnıñ yazısında böyle buyurulğan: «Men onı bazarertesi künü, iyülniñ 24-nde, ziyaret etken edim. Alekseyni maña çıqarğamazdan ögüne, mahsus bölük hadimleri oña haber kâğıtını oqumağa bergenler. Vesiqada – Rusiye vatandaşlığından vazgeçmek içün 2014 senesi aprelniñ 18-nde Bağçasarayda yazğan arizası tapılmağanı, ve o endi Qırım istilâsına dair qanun esasında Rusiye vatandaşı sayılacağı bildirilgen. Sentsov ve Kolçenkoğa endi böyle yapılğan edi. Ve artıq iç bir ukrain konsulı oña yiberilmeycek. Ve qalğan cezasını vatanda alması içün başlatılğan ceryan toqtatılacaqtır. Rusiyede Çirniy endi müddetniñ aman-aman yarısını apiste keçirdi».

İlya Novikov hatırlattı ki, Aleksiy Çirniy 2016 senesi oktâbrniñ 6-nda Bataysk apishanesine ketirilgen edi, «ondan berli o çeşit sebeplerden dört kere ceza izolâtorına oturtılğan edi».

Rusiyede ukrain vatandaşına qarşı yapılğan soñki aretlerge dair Ukraina Tışqı işler nazirliginiñ izaatı şimdilik yoq.

2016 senesi oktâbr ayında Ukraina Adliye nazirligi, muracaat azırlap, qanunsız mahküm etilgen qırımlı Aleksey Çirniyniñ teslim etilmesini talap etecegi aqqında malüm olğan edi.

Rusiye silâlı hızmet vekilleri Çirniyni 2014 senesi, Qırım Rusiye tarafından işğal etilgen soñ, mayıs ayında tutıp onı qabaatladı, ayrıca Aqmescitte Leninniñ abidesini yıqmağa istegenini iddia etken edi. Doquz ay devamında ukrain konsulı oña yiberilmey edi, körüşüv devamında ise Çirniy, oña qarşı eskence qullanılğanını bildirgen edi.

XS
SM
MD
LG