Link açıqlığı

Qırımda «ukrain diversantları davasınıñ» mabusı Stognige qarşı alınğan mahkeme ükmü evelki iddianen bağlı degil – uquq qorçalayıcılar


Aleksey Stogniy

Kremlniñ nezaretindeki Aqmescit rayon mahkemesi «ukrain diversantları davasınıñ» mabuslarından biri Aleksey Stogniyge qarşı qabaatlayıcı qararnı qabul etti ve onı 3 yıl ve 6 ayğa azatlıqtan marum etti. Bunı iyülniñ 26-nda Qırım uquq qorçalayıcı gruppası haber etti.

Uquq qorçalayıcılarnıñ bergen malümatına köre, Rusiye Cinaiy Kodeksiniñ 222 mad. 1 q. (Silânıñ, silâ qısımlarınıñ, yükleriniñ qanunsız alınması, teslim etilmesi, satuvı, saqlanuvı, naqil etüvi ve taşuvı) ve Rusiye CK 223 mad. 1 q. (Ateşli silânıñ azırlanuvı, deñiştirilüvi ya da tamiri) esasında Stogniyge qarşı mahkeme ükümi qabul etildi.

Bu maddeler, Stogniyge qarşı iddia etilgen ilk qabaatnen bağlı degil.

İstilâ etilgen Qırımda 2017 senesi «ukrain diversantları davasınıñ» daa bir mabusı Vladimir Prisiç 3 yılğa azatlıqtan marum etildi. Amma o farqlı madde – narkotiklerniñ saqlavı – esasında qabaatlanğan oldı.

2016 senesi avgustnıñ 10-nda Rusiyeniñ FSB temsilcileri, avgustnıñ 7-nde gece Qırımda «ukrain diversantlarınıñ» taqımı tutılğanını beyan etken edi. Olar sanki yarımadada terrorizm areketini azırlamaq niyetinde olğanlar. Bu beyanattan ögüne işğal etilgen Qırımnıñ memuriy sıñırındaki kiriş ve çıqış noqtaları, Rusiye sıñırcılarınıñ nezaretinde olıp, üç kün devamında qapatıla edi.

Ukraina akimiyeti Moskvanıñ iddialarını red ete ve olarnı Rusiye mahsus hızmetleriniñ «provokatsiyaları» olaraq tanıy.

Avgustnıñ 12-nde rusiyeli REN-TV telekanalınıñ web-sitesinde ukrainli Yevgeniy Panovnıñ sorğusına dair video-levha yayınlandı. Videoda o FSB-niñ bütün iddialarını qabul ve itiraf ete. Bundan soñ uquq qorçalayıcılar, Panovnıñ bedeninde zorbalıq izleri körüngenini beyan etken edi.

XS
SM
MD
LG