Link açıqlığı

Çiygoz mahkemede fevralniñ 26-da olıp keçken mitingni teşkil etmegenini bildirdi – advokat


Kreml kontrol etken Qırım Yuqarı mahkemesiniñ iyülniñ 26-da keçirilgen oturışında 2014 senesi fevralniñ 26-da Qırım Yuqarı Şurasınıñ binası ögünde Ukraina topraq bütünligine qoltutuv mitinginde iştirak etkeni ve onı teşkil etkeni içün mahküm etilgen qırımtatar milliy areketi liderlerinden birisi Ahtem Çiygoz sorğuğa çekilip, tedbirniñ teşkil etilmesinen oğraşmağanını bildirdi. Bunı advokat Nikolay Polozov Qırım.Aqiqatqa haber etti.

«Meclis toplaşuvından soñ (2014 senesi fevralniñ 25 – QA) Ahtem Çiygoz evine, Bağçasarayğa ketti. Aqşam ya da gece birisine telefon etkeni yoq, regional meclislerni insanlar mitingde iştirak etsin dep, haberdar etmegen edi», – dep tarif etti Çiygoznıñ aytqanlarını Polozov.

İyülniñ 25-de mahkeme Ahtem Çiygoznı sorğuğa çekmege başladı. Advokat Nikolay Polozovnıñ bildirgenine köre, birinci sorğu fevralniñ 25-de ve 26-da olıp keçken vaqialarnıñ tarihiy tarafları ve esaslarına bağışlandı.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG