Link açıqlığı

FSB Ukraina havfsızlıq hızmeti memuriy sıñırda qırımlılarnı işbirligi yapmağa zorlay, dep qorquza


İşğal altındaki Qırımnıñ Rusiye FSB idaresiniñ yolbaşçısı Viktor Palagin bildire ki, ukrain mahsus hızmetleri «qırımlılarnı işbirligi yapmağa mecbur ete». Bunı Palagin iyülniñ 25-de jurnalistlernen subetleşip bildirdi, dep haber ete Rusiye kütleviy haber vastaları.

Onıñ aytqanına köre, mezkür noqtalar işğal etilgen Qırımnıñ memuriy sıñırında yerleşmekte.

«Ukraina Qırımda kurort mevsimi olmasını istemey. Manialar yapıla. Qırımlılarnen işbirligi yapıla, Ukraina havfsızlıq hızmeti ve mudafaa nazirliginiñ baş istihbarat idaresiniñ hadimlerinden filtrler yapıla. Qırımlılar bu noqtalardan keçmege mecbur. Reberlerni işbirligi yapmağa zorlaylar», – dep tekrarlay Palaginniñ aytqanlarını TASS Rusiye agentligi.

FSB «işbirligi yapmağa razı olğan» insanlar Rusiye uquq qoruyıcılarına bunı özleri ayta, dep bildire.

«Er ay hadimler kelip, ukrain tarafı olarnı işbirligi yapmağa mecbur etti, dep haber ete. İnsanlarnı zorladılar, başqa çareleri yoq edi», – dep ayttı Palagin.

2016 senesi avgustnıñ 10-da Rusiye Federal havfsızlıq hızmeti avgustnıñ 7-ne keçer gecesi işğal etilgen Qırımda «ukrain diversantlarını» yaqaladı, olar yarımadada terakt kerçekleştirmege planlaştırğan ekenler. Rusiye mahsus hızmetleri yaqalanğan Yevgeniy Panov ve Andrey Zahtey «diversantlar gruppasına» kirgen edi, dep bildirdiler.

2016 senesi noyabrniñ 9-da Aqyarda «Ukraina Mudafaa nazirligi baş istihbarat idaresiniñ diversion-terroristik gruppasınıñ azaları» Dmitriy Ştıblikov, Aleksey Bessarabov ve Vladimir Dudka yaqalanğan ediler.

Kreml kontrol etken Aqyar Lenin rayon mahkemesi noyabrniñ 10-da Aqyarda tutulğan üç arbiy ekspertni apiske alıp, olarnı diversiya azırlağanında qabaatladı.

Ukraina havfsızlıq hızmeti Qırımda tutulğan Ukraina vatandaşları SBU hadimleri olmağanını bildirdi.

Ukraina Mudafaa nazirliginiñ ATO meseleleri spikeri Andrey Lısenko Qırımda yaşağan sabıq ukrain arbiyleri «Rusiye mahsus hızmetleriniñ qurbanları ola bile», dep bildirdi.

XS
SM
MD
LG