Kreml tarafından tain etilgen Qırım akimiyetiniñ yolbaşçısı Sergey Aksönov dey ki, 2018 senesinden başlap yarımadanıñ köy sakinleri içün bala bağçaları bedava olacaq. Bunı o iyülniñ 25-nde Rusiyege tabi olğan Qırım akimiyetiniñ ziyaret toplaşuvı devamında beyan etken.
«Köy sakinlerini desteklemek içün olarnı bala bağça ödemelerinden serbest etmege añlaştıq, çünki bügünki künde köy regionlarında, şeer belediyelerine nisbeten, para bayağı eksik», – dedi o.
Sergey Aksönovnıñ sözlerine köre, ilk esaplarğa binaen, leyhanıñ masrafları tahminen 1 mlrd ruble (tahminen 420 mln grivna – QA) teşkil etecek.
Öz Facebook saifesinde Aksönov qayd etti ki, leyha «daimiy surette, ya da, eñ azından, köylerde işten boş vaqıt ve infrastruktura saasını paranen teminleycek şirketler ğayırdan tikleneceklerine qadar» çalışacaq eken.
İyülniñ soñunda Aqmescitte bala bağçalarınıñ tamir işlerine paranı ana-babalardan talap etmege yasaq etilgeni malüm olğan edi.
2017 senesiniñ başında tahminen 20 biñ bala Qırımda bala bağçasına barmaq içün nevbet beklemek içün qayd etilgen edi. Qırımnıñ Rus akimiyeti aqmescitte 18 yañı bala bağçasını qurmağa ve Qırımda bala bağçalarında eñ azından 9 biñ yañı yerler açmağa vade etken edi.
