Link açıqlığı

Polozov: ilk sorğusında Çiygoz fevralniñ 25 ve 26-nda olğan adiselerniñ sebeplerini añlattı


Qırımtatar milliy areketiniñ yetekçilerinden biri Ahtem Çiygoznıñ ilk sorğusı tarihiy suallernen ve fevralniñ 25 ve 26-nda olğan adiselerniñ sebeplerinen bağlı oldı. 2014 senesi fevralniñ 26-nda Qırım Yuqarı Şurasınıñ binası qarşısınıda Ukrainanıñ topraq bütünligini desteklemek içün ötkerilgen mitingni teşkil etkeninde qabaatlanğan Ahtem Çiygoznıñ mahkemesi iyülniñ 25-nde Kremlniñ nezaretinde olğan Qırım Yuqarı mahkemesinde devam ettirildi.

«Bügünki toplaşuv bütünley tarihiy suallerge ve fefralniñ 25 ve 26-nda olğan vaqialarnıñ sebeplerine bağışlandı. Qırımtatarlar ne içün bu merasimde iştirak etken edi, olarnıñ maqsatları ne edi? Ahtem Çiygoz bunı mümkün olğanı qadar tafsilâtlı şekilde añlattı. Yarın Ahtem Çiygoznıñ sorğusı devam ettirilecek, ve biz tamam fevralniñ 25-26-nda olğan adiselerge dair onıñ ifadelerini diñleycemiz», – dep bildirdi advokat Nikolay Polozov Qırım.Aqiqatqa.

Mahkeme toplaşuvnıñ birinci qısımında Ahtem Çiygozdan Qırımtatar Milliy Meclisniñ terkibi ve faaliyet temelleri aqqında sualler soralğan edi.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG