Link açıqlığı

Qırımnıñ Curçı rayonında loqsahane içün ekimler yetişmedi – baş nazir muavini


Qırımnıñ Curçı rayonında, mutehassıslarnıñ olmağanı sebebinden, loqsahane çalışmay. Bunı Rusiyege tabi olğan Qırım akimiyetiniñ yolbaşçı muavini Larisa Opanasük iyülniñ 25-nde ziyaret sessiyası çerçivesinde bildirdi.

«Adamlar bu problemanen muracaat ete. Rayonda loqsahane çalışmay, bazanıñ özü yahşı, amma mutehassıslar yoq. Bu sebepten adamlar (bala doğurmaq içün – QA) Aqmescitke bara», – dedi o.

Larisa Opanasükniñ sözlerine köre, Rusiye bücetinden para berilse bu problema çezilmek mümkün.

Curçı rayonı memuriyetiniñ vekilleri, rayon hastahanesinde başqa ihtisas saalarında da ekimler yetişmegenini bildirdi. Rusiyeniñ nezaretindeki Qırım akimiyetiniñ yolbaşçısı Sergey Aksönov mesül memurlarğa bu meseleniñ çezilmesine dair tekliflerini azırlamağa emir etti.

2017 senesi iyün ayınıñ başında, Aqmescit rayonındaki Sarabuz qasabasında rayonnıñ bala hastahanesi ekimlerniñ yetişmemezligi sebebinden qapalğanı aqqında haber etilgen edi.

XS
SM
MD
LG