«Ervin qayda?» aktsiyasınıñ faalleri iyülniñ 26-da Kyivdeki Rusiye elçihanesiniñ pencerelerine Qırımda ğayıp olğan ve tutulğan sakinlerni «tapıp azat etmek» talabını alıp ketecek olalar.
«Aktsiyağa «yüksek boylu insanlar» davet etildi, olar Rusiye Federatsiyası diplomatik missiyası hadimleriniñ pencerelerine şiarlarnı «yetkizmege» razı oldı. Er aktsiyada elçihane hadimleri faallerniñ suallerinden saqlana, lâkin çarşenbe künü bütün talaplarımıznı mıtlaqa körecekler», – dep aytıla aktsiya teşkilâtçılarınıñ haberinde.
Kyivde «FIND & FREE» informatsion kampaniyası çerçivesinde «Ervin qayda?» aktsiyası 13-ünci kere keçirile.
Faallerniñ bildirgenine köre, Rusiye Qırımnı işğal etkeninen 44 qırımlı ğayıp oldı. 17 insan tapıldı, 19 – bugünge qadar ğayıp sayıla, 6 – ölü tapılğan, daa ekisi apiste yata.
Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.
