Salı künü, iyülniñ 25-de, Kreml kontrol etken Qırım Yuqarı mahkemesinde ilk sefer qırımtatar milliy areketiniñ liderlerinden birisi Ahtem Çiygoz sorğuğa çekilecek. Bunı advokat Nikolay Polozov Qırım.Aqiqatqa tarif etti.
«Yarın Ahtem Çiygoznıñ sorğusı olacaq. Esnas devamında bir kere bile malümat bermegen edi. İlk taqiqat devamında da malümat bermedi. Bizler qabaat ve imaye taraflarınıñ bütün delillerini tedqiq etmege istedik, soñra ise Çiygoznıñ sorğuğa çekilmesini rica etecek oldıq», – dedi Polozov.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
