Rusiyeniñ nezaretindeki Aqmescit memuriyetiniñ Gençlik, sport ve turizm idaresi mahsus programma çerçivesinde vatanperverlik terbiyesi, sağlam ayat tarzınıñ teşviqatı ve «vatanperverlik duyğusı ile Rusiye kimliginiñ şekillenmesi» üzerinde çalışa. Bu aqta şeerdeki şimdiki memuriyetniñ web-sitesinde bildirile.
«Vatanperverlik duyğusı ile Rusiye kimliginiñ şekillenmesi» içün «Qırım baari – deñişmeler zamanı» ve «Karyera: plan, strategiya, basamaqlar» adlı yaşlar forumları ötkerile, em de «Rusiye gençlik Künü, Ulu Vatan Cenkiniñ Ğalebe Künü munasebetinen şeerde bayram merasimleri ve aktsiyalar» teşkil oluna.
Bundan ğayrı, memuriyet tarafından arbiy-vatanperverlik terbiyesi içün bir sıra merasimler keçirile eken: «Şeerde gençlerniñ ve studentlerniñ vatanperverlik toplaşuvı ve «Patriot» oyunı», «Zarnitsa» adlı arbiy-sport oyunı, studentlik yaşları içün paintball yarışları.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
