Qırımda, adetince, yüzüm bağları 100 biñ gektar meydanlıqta östürile edi, lâkin bügün bu raqam aman-aman üç qat eksildi ve tahminen 30 biñ gektarnı teşkil ete. Böyle malümatnı iyülniñ 24-nde, tögerek masa devamında, Rusiyege tabi olğan Qırım parlamentiniñ agrar siyaseti, ekologiya ve tabiat resursları komitetiniñ yolbaşçısı İgor Budanov seslendirdi.
Budanov: «Bu saanı yañıdan tiklemek ve evelki miqyasqa ketirmek içün em federal, em de regional seviyede bir sıra problemli meselelerniñ çezilmesi kerek. Sadece Qırım içün degil, amma bütün Rusiye içün de yüzümcilik-şarapçılıq saasınıñ emiyetini közge alıp, şarap çıqarğan şirketlerniñ işi ayrı hususiy qanun ile idare etlmeli», – dep aytqan.
Onıñ sözlerine köre, Devet Duması içün kerekli teklifler endi azırlanıldı «amma vesiqalar şimdilik mezakere etilmeli ve saanıñ işçileri tarafından teklifler qabul olunmalı».
2016 senesi Rusiye Köy hocalıq naziri Qırımdaki yüzümcilikni tenqit etken edi.
Rusiyege tabi olğan Qırım yolbaşçısı Sergey Aksönov bundan soñ Qırımnı «keyfiyetli şarap ve yüzüm çıqarğan dünya yetekçilerinen bir seviyede raqiplik yapa bilecek, Rusiyeniñ ileri ketken regionı yapmağa» niyetli olğanını beyan etken edi.
Qırım istilâsından soñ yarımadanıñ şarapçıları, Rusiyeniñ standartlarına ve qanun talaplarına riayet etkenleri vaqıt, bir sıra problemlenen qarşılaştı.
