2017 senesi iyülniñ 24-nde olğan vaziyette, eñ azından 1 mln 580 biñ 646 adam, ya da 1 million 270 biñ 372 qoranta Qırımdan ve Kyivniñ nezaretinden çıqarılğan Donbassnıñ regionlrından çıqıp köçken.
Bunı iyülniñ 24-nde Ukraina Haber siyaseti nazirliginiñ matbuat hızmeti haber etti.
Ukrain nazirliginde bildirdiler ki, 2017 senesi iyülniñ 24-ne qadar, köçkenlerge devlet tarafından tahminen 1 mln 654 biñ 700 grivna yardım olaraq berildi.
2014 senesiniñ mart ayında Qırım Rusiye tarafından işğal etilgen soñ, yarımada sakinleriniñ bir qısımı Ukrainanıñ qıtaiy qısımına köçti. 2017 senesi fevral ayınıñ soñuna qadar Ukrainanıñ fevqulâde vaziyetler boyunca Devlet hızmetiniñ regional merkezleri 1 million 62 biñ 460-tan çoq köçken şahısnı qayd etken edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
