Kreml kontrol etken Qırım Yuqarı mahkemesiniñ iyülniñ 24-de «Çiygoz davasında» keçirgen daa bir oturışında mahkeme imayeniñ dava malümatlarına qoşma vesiqalarnıñ ilâve etilmesinen bağlı bir qaç muracaatını red etti. Bunı advokat Nikolay Polozov oturışnıñ birinci qısmından soñ Qırım.Aqiqatqa tarif etti.
«İmaye halqara uquq qorçalayıcı teşkilâtlarnıñ fevralniñ 26-da olıp keçken vaqialar aqqında maruzasınıñ ilâve etilmesini istedi. Mahkeme olarnı qoşmağa razı olmadı. Refat Çubarovnıñ (Qırımtatar Milliy Meclisiniñ reisi – QA) sorav protokolını ilâve etmege rica ettik. Mahkeme razı olmadı. Mahkeme Qırım prokuraturasından Çubarovnıñ kiriş yasağına dair vesiqanı talap etmege razı olmadı, yasaqnı oña 2014 senesi prokuror Poklonskaya seslendirgen edi», – dep tarif etti Polozov.
Advokatnıñ aytqanına köre, Rusiye mahkemesi davağa bir vesiqa ilâve etti.
«İmaye Ukraina baş konsullığınıñ mektübini, advokatnıñ soratmasına berilgen cevap, Refat Çubarovnıñ yazma vesiqasını qoşmağa rica etti. Meclis ve Meclis reisiniñ muavini aqqında vesiqa qoşuldı. Ahtem Çiygoznıñ o vaqıt ayrı bir vekâletleri olmağanı aytıla. Olar Zaur Smirnovğa yüklengen edi», – dep bildirdi Polozov.
Çiygoz kene mahkeme çekilmesini istedi. Oturışnıñ ekinci qısmında bunıñnen bağlı qarar seslendirilecektir.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
