Link açıqlığı

Çubarov: Qırım statusınen bağlı Ukraina Anayasasınıñ deñişmeleri sentâbr ayında azır olacaq


Refat Çubarov, arhiv fotoresimi

Ukraina halq deputatı, Qırımtatar Milliy Meclisiniñ reisi Refat Çubarov Qırım Muhtar Cumhuriyetiniñ statusınen bağlı Ukraina Anayasasınıñ deñişmeleri bu sene sentâbr ayında azır olacaq, dep bildirdi. Bunı o, «5 kanal» efirinde ayttı.

«Qırım statusını deñiştirecekmiz. Bu anayasa esnasıdır. İşçi gruppanıñ bazı azaları tatilge ketken olsa da, bizler, qırımtatarlar içün, esas olğan bölükniñ metnini sentâbr ayında prezidentke bermek içün işimizge devam etemiz. Ukraina Anayasasınıñ 10-uncı bölügi, «Qırım Muhtar Cumhuriyeti» adını taşımaqta», – dep qayd etti Çubarov.

Onıñ aytqanına köre, deñişmeler qabul etilse, bu «Qırımnıñ Ukraina sıñırlarına qaytarılması içün eñ semereli anahtar olacaqtır».

Qırımtatar Milliy Meclisiniñ reberleri Qırım Muhtar Cumhuriyeti Qırımtatar Muhtar Cumhuriyetine çevirilsin dep, Ukraina anayasasına deñişmeler kirsetmege talap ete.

Ukraina Anayasa komissiyası mayısnıñ 11-de Ukraina anayasasınıñ Qırım Muhtar Cumhuriyeti bölügine kirsetilecek tüzetme ve ilâvelerni azırlaycaq işçi gruppanı qurmağa qarar aldı. İşçi gruppanıñ birinci toplaşuvı mayısnıñ 24-de olıp keçti.

Ukraina prezidenti Petro Poroşenko qırımtatar halqı sürgünliginiñ qurbanlarını añma tedbirleri vaqtında çıqışta bulunıp, Qırımda tiklenecek qırımtatar milliy muhtariyeti diger milletlerniñ aq-uquqlarına emiyet berecek, dep bildirdi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG