İşğal etilgen Qırımnıñ Rusiye prokuraturası «Qırım diversantları» davasınıñ mabüslerinden biri Redvan Suleymanovğa qarşı qabaatlarnıñ bir qısmından vazgeçti. Bunı iyülniñ 21-de Kreml kontrol etken Aqmescitniñ Jeleznodorojnıy rayon mahkemesinde olıp keçken daa bir oturıştan soñ Qırım advokatı Emil Kürbedinov Qırım.Aqiqatqa haber etti.
«Prokuratura qabaatnı deñiştirdi. O, bu davada zarar körgen olaraq qayd etilgen beş tarafnıñ üçü (FSB, Rusiye Fevqulâde vaziyetler nazirliginiñ Qırım idaresi ve Aqmescit ava limanı – QA) iddialarınıñ delillerini köstermedi, Suleymanov telefon açqanından kerçekten zarar körgenini isbatlamadı», – dep qayd etti Kürbedinov.
Onıñ bildirgenine köre, prokuratura Keriç parom keçiti ve Aqyar avtovokzalı zarar körgenine dair qabaatqa alâ daa qoltuta.
«Deñiz limanı tahminen 3,5 million ruble (tahminen 1,5 mln grn – QA) ve avtovokzal – tahminen 400 biñ ruble (tahminen 170 biñ grn – QA) aqqında bildire. Yani beş millionlıq zarardan 3,5-4 million rublelik (1,5 – 1,7 mln grn – QA) zararğa qadar eksildi. Zarar körgenlerniñ sayısı eksildi. Lâkin qabaat maddesiniñ bir qısmına tesiri olmadı», – dep bildirdi advokat.
Kürbedinov ileride mahkemeni «bütün raqamlar temelsiz olğanında» işandıracağına ümüt ete.
Suleymanov davasınıñ nevbetteki mahkeme oturışı iyülniñ 31-ne saat 14:00-ğa belgilendi. Apiske alınğanına tam bir yıl tolacaq.
Redvan Suleymanov iyülniñ 30-da Aqmescit ava limanında yaqalanğan edi. Avgustnıñ 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
«Qırım diversantları davasınıñ» mabüsi Redvan Suleymanov mahkemede qabaatını tanıdı, lâkin büyük zarar ketirgeninen razı olmadı, dep haber etilgen edi.
