Cuma künü, iyülniñ 21-de, qırımlı advokat Edem Semedlâyev Rostov-na-Donu şeerindeki SİZOda aqyarlı «Hizb ut-Tahrir davasınıñ» mabüsi Ruslan Zeytullayevnen körüşti. Bunı o Facebooktaki video muracaatında tarif etti.
Advokatnıñ aytqanına köre, Zeytullayev eki açlıqtan soñ özüni yahşı is ete.
«İyülniñ 27-de Ruslan, advokatları ve qabaat tarafınıñ şikâyet arizaları baqılacaq. Onı Moskva şeeriniñ Yuqarı mahkemesi baqacaq. Bütün küçlü taraflarımıznı laf ettik, seslendirecek şeylerimizni muzakere ettik. O, apellâtsiyağa azır, bir de bir ümüti yoq, çünki qayda olğanını ve kimler tarafından mahküm etilecegini añlay», – dep tarif etti Semedlâyev.
Aprelniñ 26-da Rusiyeniñ Şimal-Kavkaz bölge arbiy mahkemesi «Hizb ut-Tahrir davasınıñ» mabüsi Ruslan Zeytullayevni 12 yılğa azatlıqtan marum etti.
Rostov-na-Donu şeerindeki Şimal-Kavkaz bölge arbiy mahkemesi 2016 senesi sentâbrniñ 7-de Zeytullayevni «terrorist cemiyette iştirak etkeninde» qabaatlı olaraq tanıp, oña 7 yıl apis cezasını berdi. Rusiye prokuraturası Rusiye Yuqarı mahkemesiniñ bu qararına itiraz bildirdi ve dava tekrar baqılması içün kene Şimal-Kavkaz bölge arbiy mahkemesine qaytarıldı. Taqiqat organları Zeytullayevnıñ terrorist cemiyet iştirakçisi degil de, teşkilâtçı olaraq tanılmasını istey. Rusiye Ceza Kodeksiniñ bu maddesi eñ azından 15 yıl ve atta ömür boyu apis cezasına ketirmek mümkün.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
