Aqmescitte iyülniñ 19-da aqşam qavehane, tükân yerleştirilmesi ve ofis binalarınıñ qurulması içün berilgen topraq damartılarını qullanma meseleleri boyunca cemaat diñlevleri olıp keçti. Sakinlerniñ narazılığı Salğır özeninden 35 metr mesafedeki yalı kenarında maşina turağınıñ qurucılıq ğayesinen bağlı, dep bildire «Qırım haber agentligi».
«Aqmescitliler şeer memuriyetinen yañı «Naberejnıy» ticaret-ofis merkezi ve Naberejnaya 28A adresi boyunca onıñ maşina turaqlarınıñ qurulması mevzusında bir qarar kelmedi. Obyekt 16 qatlı bina ve şeer amamı arasında yerleşecek. Qurucılıq leyhasına köre, qavehane ve maşina turaqları olacaq 14 qatlı yañı bina Salğır özeninden 35 metr mesafede aman-aman 10 biñ metr kârede yerleşip, Suvorov obası adlı tarihiy yerine yaqın olacaq», – dep haber ete neşir.
Qurucı vekiliniñ bildirgenine köre, ticaret merkezi mümkün olğan turaq yerleriniñ sayısından ziyadesini quracaq
Aqmescit sakinleri qarşı çıqtı – Rusiye qanunları özenlerniñ suvları baqılğan alanlarda açıq maşina turaqlarını qurmağa yasaqlay.
Şeer sakinleri meseleni baqmamağa talap etti, lâkin Aqmescit memuriyetiniñ Rusiye yolbaşçısı Gennadiy Baharev diñlevlerni devam ettirdi.
Diñlevlerde iştirak etkenlerniñ aman-aman 50 fayızı narazılıq bildirip, toplaşuv salonını terk etti. Qalğan iştirakçiler rey bergen soñ davalı mesele çezildi.
Qurucı bir de bir izaat bermey.
Aynı künü «Aktivnıy Simferopol» areketiniñ temsilcileri Kreml kontrol etken Aqmescit memuriyeti ve şeer şurasına işanmağanını bildirip, yerli akimiyetten bir sıra şey talap etti. Şu cümleden cemaat ve şeer qurucılığı şuralarını dağıtmağa talap etildi. Faaller iyülniñ 22-de piketke çıqacağını bildirdiler.
