Lvivde iyülnin 18-nde ötkerilecek «Kovçeg» adlı halqara ve dinlerara gençler seminar-forumı, qırımtatar, leh ve yeudi halqlarınıñ vekillerini bir arağa toplap, bir-birini añlav seviyesini yükseltmek ve munasebetlerni inkişaf ettirmek meselesini muzakere ettirecek. Merasimniñ esas şiarı: «Divar degil, köpür qurmaq» olacaq, bunı Qırım.Aqiqatqa Qırımtatar Milliy Meclis reisi Refat Çubarov bildirdi, o da bu merasimde iştirak etecek.
«Biz halqlarımız arasında fikirdeşlik aqqında söz yürsetecemiz, hususan ukrain-leh, qırımtatar ve yeudilerniñ munasebetleri çerçivesinde», – dep qayd etti o.
«Kovçeg» seminar-forumı er sene Lviv şeerinde ötkerile, onı Lehistan Cumhuriyetiniñ Lvivdeki baş konsullığı, «Tkuma» Holokostnı tedqiq etken Ukrain institutı, Ukrain katolik universiteti, «Crimea SOS» cemaat teşkilâtı, Gnat Hotkeviç adına Şeer medeniyet sarayı teşkil etmekte.
2014 senesi martnıñ 20-nde Yuqarı Rada qırımtatarlarnı Qırımnıñ tamır halqı olaraq tanıdı. Bu qararğa 283 deputat qoltutqan edi. Ukraina qırımtatarlarnıñ tamır halqı olaraq etnik, medeniyet, til ve din hususiyetleriniñ saqlap qalması ve inkişafını kefil etmege vade etti.
