Link açıqlığı

Esir etilgen İbragimovnıñ doğğan kününde failler onıñ ana-babasını ziyaret etti


Qırımtatar failleri esir etilgen Ervin İbragimovnıñ ana-babasını ziyaret etti

Qırımtatar faileri iyülniñ 17-nde Bağçasaryda 2016 senesi esir etilip qaçırılğan Dünya Qırımtatarlar Kongressiniñ icra şura azası Ervin İbragimovnıñ ana-babasını ziyaret etti. Bazarertesi künü o 32 yaşını tolturdı. Bunı Qırım.Aqiqatqa Radio Svobodanıñ muhbiri Anton Naumlük haber etti.

Doğğan künleri Ervinnen bir künge kelgen babası ve anası Umer İbragimov ve Lilâ Aliyevanı desteklemek içün, olarğa qırımtatarlarnıñ yetekçilerinden biri İlmi Umerov, faaliyetçi Nariman Celâl, Ahtem Çiygoznıñ babası Zeytulla Çiygoz, Mustafa Cemilevniñ apayı Safinar Cemileva, qırımtatar milliy areketiniñ üyken iştirakçilerinden biri Zodiye Saliyeva ve aileniñ dostları keldi.

Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.

Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».

Rus prokuraturasınıñ bergen malümatına köre, 2014 senesinden berli Qırımda insanlarnıñ ğayıp olmalarınen bağlı 200-den ziyade cinaiy iş açılğan. Sabıq prokuror Natalya Poklonskayanıñ sözlerine köre, olardan 26-sı – qırımtatarlarnıñ ğayıp olmasınen bağlı. Uquq qorçalayıcılar, siyasiy sebeplerden qaçırılğan adamlarnıñ sayısı onlarnen esaplanmaq mümkün olğanını tüşüne.

Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.

XS
SM
MD
LG