Halqara Bellingcat taqiqatçılar taqımınıñ ekspertleri, MH17 qazasınıñ üçünci yıllığına bağışlanılğan maruzasında, «Malaysian Airlines» şirketiniñ «Boeing 777» uçağını ancaq Rusiye silâlı quvetlerinin 332 sanlı «Buk» raketa kompleksi urıp tüşürmek mümkün olğanını beyan etti.
İyülniñ 17-nde derc etilgen Bellingcat taqımınıñ 72 saifelik marusazı böyle neticege kele.
«Rusiyeli 332 sanlı «Buk», Rusiye Federatsiyası silâlı quvetleriniñ 53-nci zenit-raketa brigadasına ait edi, o – MH17 seferini eda etken Boeing uçağını urıp tüşürmek mümkün olğan «ihtimallı yekâne namzet» ola», – dep aytıla vesiqada.
Bellingcat Rusiyeli «Almaz-Antey» şirketiniñ yañlış iddiasını da tenqit ete. Bu iddiağa köre uçaq Ukraina Arbiy küçleriniñ nezaretinde olğan Zaroşçenske ve Velıka Şışovka köyleri civarında urulğan edi.
Birleşken taqiqat taqımına kirgen vekillerniñ devletleri umumiy qarar aldı ve MH17 seferiniñ qazasına dair cinaiy dava Felemenkte mahkemede baqılacağını tasdiqladı. Bunı iyülniñ 5-nde Felemenk Tışqı işler naziri Bert Koenders beyan etken edi.
Birleşken taqiqat taqımına Avstraliya, Belçika, Malayziya, Ukraina ve Felemenk vekilleri kirmekte.
«Malaysian Airlines» ava şirketiniñ «Boeing-777» uçağı Amsterdamdan Kuala Lumpurğa uçqanda Ukraina şarqındaki Rusiye separatistleri zapt etken yerde 2014 senesi iyül 17-de tüşürilgen edi. 298 insan elâk oldı.
Keçken sene sentâbrniñ soñunda Felemenk prokuraturasınıñ reberliginde çalışqan Halqara taqiqat taqımı taqiqatnıñ ilk neticelerini ilân etken edi. Maruzada aytıla ki, «Boeing» uçağını urıp tüşürgen «Buk» raketa kompleksi Ukrainağa Rusiyeden ketirilgen edi. Raketanıñ avağa uçurtılğan yeri – Pervomayskoye köyü, onı o vaqıt Rusiyege tabi olğan cenkâverler kontrol ete edi. Esabatqa köre, tahminen 100 adam bu cinayette şekli olaraq keçe.
Kreml, bu beyanat «soñ aqiqat» olmağanı beyan etken edi, taqiqatçılarnıñ hulâsaları ise «evelden yapılğanını» ayttı. Rusiye MİD-i maruzanı «peşin fikirli» olaraq tanıdı.
