Link açıqlığı

Uquq qorçalayıcı: Qırımda taqiqatçılar esir etilgen Ervin İbragimovnıñ ailesinen qonuşmağa razı olmay


Tamila Taşeva «Ervin qayda?» aktsiyası vaqıtında, iyünniñ 27-si, Kyiv

İşğal etilgen Qırımda Rus taqiqatı, 2016 senesi esir etilgen Dünya Qırımtatar Kongressiniñ icra şura azası Ervin İbragimovnıñ ailesinen «qonuşmağa istemey». Bunı Qırım.Aqiqatqa uquq qorçalayıcı, «CrimeaSOS» cemaat teşebbüsiniñ reberi Tamila Taşeva tarif etti.

«Tuvğanları, er daim alâqalı olmağa istese de, taqiqatçılar olarğa iç bir malümat bermey. Soñki vaqıtları taqiqatçı telefonını bile almay ve Ervinniñ babasına cevap bermey. İş mürekkep, çünki Ervinni kim ve nasıl qaçırğanı aqqında bütün malümat endi toplanılğan edi, amma taqiqat işleri ögge sürülmey, bunıñ sebebi – taqiqatçılarnıñ isteksizligi», – dedi Taşeva.

Onıñ sözlerine köre, Rusiyeniñ hızmetlerine tesir etmek içün tapılğan malümat mümün olğanı qadar keñiş surette yayılmaq kerek, bu cümleden halqara meydançıqlarda da.

Böyle etip, İnsan aqları boyunca BMT Şurasınıñ mecburiy ve zoraki qaçıruvlar boyunca işçi gruppasınıñ toplaşuvında failler İbragimovnıñ esir etilüvi aqqında tarif etmege niyetli.

Bunen beraber «CrimeaSOS» cemaat teşebbüsi İbragimovnıñ ğayıp olmasınen bağlı şikâyetni Avropa İnsan aqları mahkemesine (AİHM) yollamağa azırlana.

Bügün, iyülniñ 17-nde, Ervin İbragimov 32 yaşını toldurdı. Bu künü bir yıl evelsi ğayıp olğannıñ evi yanında qırımtatarları dua keçirgen edi, o vaqıt 300-ge yaqın adam onıñ qorantasını desteklemek içün kelgen edi.

Dünya qırımtatar kongressi icra şurasınıñ azası Ervin İbragimov 2016 senesi mayısnıñ 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.

Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».

Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.

XS
SM
MD
LG