Tamır halqları ve uquq qorçalayıcı teşkilâtlar Rusiyeni ve Ukrainanı Qırımdaki tamır halqalrınıñ öz taqdirlerine dair iradelerini ürmet etmege ve olarnıñ tabiiy aqlarını desteklemege çağırdı. Bu aqta muracaatname Tamır halqlarınıñ aqlarına bağışlanğan BMT sessiyası devamında qabul etildi, dep haber ete Qırımtatar Maaliy Merkezi.
«Eki tarafnıñ basqısı astında qalğan Qırımnıñ tamır halqlarına: qırımtatarlarına, qaraylarğa ve qırımçaqlarğa – diqqat celp etilmek kerek», – dep aytıla beyanatta.
Bunen beraber qayd etile ki, Qırımtatar Milliy Meclisi kibi tamır halqınıñ temsil organı «alelhusus basqığa oğratıla ve imaye, ürmet ve destekke muhtac» qala.
«Biz Rusiye ve Ukrainanı Qırım tamır halqlarınıñ iradesini ürmet etmege, olarnıñ söz serbestligini desteklemege rica etemiz», – dep buyurıla petitsiyanıñ metininde.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
