Kremlge tabi olğan Qırım parlamentiniñ yolbaşçısı Vladimir Konstantinov iyülniñ 17-nde qırımtatar milliy areketniñ yetekçilerinden biri Ahtem Çiygozğa qarşı alıp barılğan davanıñ mahkeme oturışına kelmedi. Bunı Radio Svobodanıñ Qırımdaki muhbiri haber ete.
Moskvanıñ nezaretindeki Qırım Yuqarı mahakemesiniñ vekilleri, Konstantinovnıñ sorğusı bu afta yapılacağını ayta, amma tam kününi bildirmey.
Çiygoznıñ advokatı Nikolay Polozov dey ki, Çiygoznıñ özü kelecek afta sorğu esnasında ifadelerini seslendirecek. Bundan soñ teneffüs ilân etilip, dava taraflarına munaqaşa azırlıqları içün vaqıt berilecek. Tartışmalar ise, bese-belli, avgustnıñ ekinci aftasında ötkerilecek.
Kreml kontrol etken işğal altındaki Qırımnıñ Yuqarı mahkemesi iyünniñ 22-de Ahtem Çiygoznıñ apiste yatma müddetini üç ayğa – oktâbrniñ 8-ne qadar uzattı. Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
