Link açıqlığı

Aqyarda Potömkinniñ abidesi içün yer seçildi


Kremlge tabi olğan Aqyar akimiyeti Rus knâzi Grigoriy Potömkinniñ abidesi içün yer sayladı. İyülniñ 13-nde qabul etilgen qararğa binaen, eykel Artbuhta civarında yerleştirilecektir.

Akimiyetniñ matbuat hızmeti bildirdi ki, «Rusiyeniñ birligi» eykeli içün de yer seçildi. O Katernaya soqağı yanında yerleştirilecektir.

«Aqyar Akimiyetiniñ mimarlıq ve sanat keñeşiniñ toplaşuvında 2017 senesi iyülniñ 4-nde qabul etilgen №6 protokol ile Potömkin eykeli içün yer olaraq – Toplar körfeziniñ (Artbuhta) töpesi ve Mayakovskiy soqağı arasında, evelki «İvuşka» oyun meydançığınıñ yerini teklif etmek qarar alındı. Ekinci qarar – «Rusiyeniñ birligi» eykeliniñ yeri olaraq Katernaya soqağınıñ civarındaki yerni tasdiqlamaq», – degen Aleksand Molojavenko. Moskvağa tabi olğan Mimarcılıq ve şeer quruv departamenti müdiriniñ aytqan bu sözlerini RİA Novostsi Krım derc ete.

Agentlikniñ malümatına köre, eki eykel bir hatıra kömpleksiniñ parçası olacaq, o Katernaya soqağı ve Artbuhta arasına – Hrustalnıy (Büllür) burunında qurulacaqtır. «Rusiyeniñ birligi» eykelini Rusiyede 1920-ci seneleri yüz bergen Vatandaşlıq cenkiniñ hatırası olaraq tiklemege teklif etile.

XS
SM
MD
LG