2016 senesi neticesinde Qırımda 1423 şahıs bir milliondan bir milliardqa qadar ruble miqdarında para qazanğanını beyan etken. Bunı Rusiyeniñ yarımadadaki bergi hızmetiniñ matbuat hızmeti bildire.
Müessiseniñ bergen malümatına köre, Qırımda yaşağan üç adam 500 million ve 1 milliard ruble arasında (8-16 million dollar arasında) mal-mülk saibi olğanını bildirdi. Daa 11 adam yıl devamında 100 million ve 500 million ruble arasına para saibi olğan.
Bergicilerniñ bildirgenine köre, 500 million rubleden çoq qazanğan üç qırımlınıñ payı – bütün kelirlerniñ 16% teşkil ete.
Müessisede qayd ettiler ki, 2017 senesi Qırımda ayrı şahıslardan 13 biñden çoq bergi beyannameleri qabul etildi, keçken seneniñ köstergiçlerine nisbeten bu raqam aman-aman üç biñge ziyade ola.
«Esas olaraq, bu meskenlerini kirağa bergen vatandaşlar ola», – dep añlattılar bergi hızmetinde.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
