İşğal altındaki Qırımnıñ Leninskoye, Sokolskoye ve Samarlinskoye suv ambarlarınıñ işletilmesi «Qırım suv hocalığı ve melioratsiya idaresi» kibi bir işhanege berilmesine qarar berildi. Bu aqta iyülniñ 12-nde Qırım suv hocalığı ve melioratsiya komitetiniñ matbuat- hızmeti bildirmekte.
Böyleliknen işbu idare yarımadanıñ şarqında yaşağan ealisiniñ suvnen temin etüv probleması çezilecek dep tüşüne. Matbuat hızmeti bildirgenine köre, yaqın zamanda Kreml nezareti altındaki Qırım ükümetiniñ portalında bu meselenen bağlı qarar derc etilecek eken.
«Goskomvodhoz reisi İgor Vaylânıñ aytqanına köre, bu qarar Keriç regionını suvnen temin etüv esnasını bütünley teşkerip, yüz berebilecek bazı vaziyetlerde suv ambarlarınıñ çalışuv rejimini idare etüv boyunca acele qararlar alınmasına yardım eter», – denilmekte haberde.
Qırımnıñ rusiyeli akimiyeti bildirgenine binaen, yarımadanıñ suv ambarlarındaki içilecek suv miqdarı 234 milliard kubometr teşkil etmekte ve bu miqdar Qırımnı kurort sezonınıñ soñuna qadar temin etmege yetecek eken.
Rusiye Qırımnı istilâ etken soñ, yarımadanı Dnepr özeninen bağlağan ekâne suv yolağı olğan Şimaliy-Qırım kanalından suv berilmesi kesilgen edi.
Dneprden kelgen suv kesilmesi neticesinde suvarıluv vastasınen asralğan Qırım ziraatçılığı çoq zarar körgen edi. Qırımnıñ suvarılğan 140 biñ gektar toprağından yerli suv imkânlar qullanaraq suvarılğan yalıñız 17 biñ gektar topraq qaldı. Artıq pirniç asralmay. Bir yıldan soñ suvarılğan topraq alanı 13,4 biñ gektarğace tüşti.
