Link açıqlığı

Qırımda tintüvniñ şaatını «ruhsetsiz mitingte iştirak etkeni» içün mahkeme eteler


Kremlniñ nezaretindeki Bağçasaray rayon mahkemesi iyülniñ 13-nde qırımtatar faili Nariman Memedinovğa qarşı açılğan memuriy davanı baqmağa niyetli. Adliyeci Lilâ Gemeciniñ bergen malümatına köre, fail – 2017 senesi aprelniñ 13-nde Seydamet Mustafayevniñ evinde tintüv keçiriligende onıñ evi yanında sanki ruhsetsiz teşkil olunğan mitingde iştirak etkeni sebebinden, mahküm etilecek. Bunı adliyeci Qırım.Aqiqatqa bergen izaatında haber etti.

«Tintüv vaqıtında bir çoq qırımtatarı kelip, semetdeşke destek bildirgen, olarnıñ arasında Nariman da bar edi. O anda olıp, uquq qoruyıcılar tarafından yapılğan provokatsiyalarğa cevap bermekten adamlarnı toqtata edi, ve böyle provokatsiyalar yapılğan edi. O (Nariman – QA), yañılmasam, şu adiselerni videoğa çeke edi», – dedi adliyeci.

Onıñ sözlerine köre, qabaatlanğan taraf memuriy davağa ve protokolnıñ özüne bir sıra itiraz bildirdi, bütün itirazlar mahkemege teslim etildi. Qabaatnıñ cezası 10-15 biñ ruble arasında cöreme olmaq mümkün, dedi Gemeci.

Rusiye uquq qoruyıcıları, qırımtatarlarnıñ evlerinde tintüvler ötkerilgende, etrafta toplaşqan faillerniñ areketine qarşı bundan evel de davalar açtıra edi.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

XS
SM
MD
LG