Link açıqlığı

Ukraina MİD yolbaşçısı Sentsovnıñ doğğan kününe bağışlanğan aktsiyanı açtı


Ukraina Tışqı işler nazirliginiñ (MİD) yolbaşçısı Pavlo Klimkin iyülniñ 13-nde ukrain siyasiy mabusı, qırımlı Oleg Sentsovnıñ doğğan kününe bağışlanılıp nazirlik binasınıñ yanında ötkerilecek aktsiyanı açtı.

Öz nutuğında Klimkin beyan etti ki, MİD «Sentsovnı qaytarmaq içün er daim küreşecek ve onı mıtlaq qaytaracaq». Bu nazirlikiñ Twitter saifesinde bildirile.

Bundan evel Ukraina Tışqı işler nazirligi er kesni müessiseniñ binasına kelip, Oleg Sentsovğa bağışlanılğan mahsus köşede resimge çıqmağa çağırğan edi. «Resimni #FreeSentsov haştag ile içtimay ağlarda yerleştirip, bizler birlikte onıñ azat etilmesi içün küreşkenimizni daa bir kere hatırlatqan olurmız», – dep aytıla edi bildirüvde.

Ukrain nazirliginiñ bildirgenine köre, köşedeki FREEDOM instalâtsiyası rejissörnin skemlesi şekilinde yapılğan, onı «llil Design» ukrain studiyası, Rusiyede qanunsız apiske alınğan ukrain rejissörı Oleg Sentsovğa bağışlap, azırlağan. İnstalâtsiya MİD binasınıñ altıncı qatında yerleşken, nazirlikni ziyaret etken bütün çetel eyyetleri onı köre bilecek eken.

Oleg Sentsov ile Aleksandr Kolçenko 2014 senesi mayıs ayında Qırımda Rusiye mahsus hızmetleri tarafından tutılğan ediler.2015 senesi avgust 25 künü Rusiyeniñ Şimaliy-Kavkaz okrug arbiy mahkemesi, Aqmescitli ukrain rejissörı Oleg Sentsovnı, terrorizmde qabaatlap, 20 yılğa sert rejim apishanesinde azatlıqtan marum etilecegi aqqında qarar alğan edi. Rusiye taqiqatçıları Qırım faali Aleksandr Kolçenkonı Sentsovnıñ qabaat ortağı olaraq tanıp, onı 10 yılğa qadar apishanege aldılar. Ekisi de öz qabaatını red ete.

«Memorial» uquq qorçalayıcı teşkilâtı Sentsov ve Kolçenkonı siyasiy mabuslar cedveline kirsetti.

XS
SM
MD
LG