Link açıqlığı

Saatnıñ esas haberi

Mahkeme içün Umerovnıñ sözleri tercime etilgende FSB öz tüzetüvlerini kirsetti – imayeci


İlmi Umerov ve onıñ advokatları mahkeme toplaşuvındalar, iyülniñ 12-si 2017 senesi
İlmi Umerov ve onıñ advokatları mahkeme toplaşuvındalar, iyülniñ 12-si 2017 senesi

İlmi Umerovnıñ ATR telekanalınıñ efirinde qırımtatar tilinde yapqan nutuğı tercime etilgende metinniñ özü Rusiye FSB hadimleri tarafından teşkerile edi, nutuqnıñ ekspertizası ise Umerovnıñ kerçekten aytqan sözerinden degil de, tercimannıñ tabirleri esasında yapılğan. Albu ki terciman Saledinov, Umerovnıñ aytmağan sözlerini qoştı: ilâveler, şeer adları ve atta soyadlarını.

Bunı iyülniñ 12-nde Kremlniñ nezaretindeki Aqmescit rayon mahkemesinde «Umerov davasınıñ» nevbetteki toplaşuvından soñ Umerovnıñ imayecilerinden biri, rusiyeli publitsist ve uquq qorçalayıcı Aleksandr Podrbinek bildirdi.

«Mahkemeden haric terciman, beş kere FSB-ge barğanına şikâyet ete edi. Ve FSB onıñ tercimesini tüzetip, tarir ete edi. Tasavur etesiñizmi, bizim ürmetli İlmi Umerovnıñ qaç tüzeticisi bar», – dedi Podrabinek.

Umerovnıñ daa bir advokatı Mark Feygin dedi ki, imaye tarafı lingvistik ekspertizanıñ tekrar – doğrudan-doğru qırımtatar tilinde yapılmasını talap etecek.

«Tercime bir-qaç şekilde tabir etilmek mümkün olsa, ekspertiza, mahkeme qararınen, yañıdan, birden qırımtatar tilinde keçirilmeli. Taqiqat tarafından qoyulğan sualler esasında, qırımtatar tilinde şu çağıruvlarnıñ olıp olmamasına dair lisaniy ekspertiza yapılsın. Ve eksperiza qırımtatar tilinde yapılmaq kerek. Soñra ise, elbet, o mahkeme esnasınıñ tiline de tercime etilmek mümkün», – dedi Feygin.

İyülniñ 12-nde Kremlniñ nezaretindeki Aqmescit rayon mahkemesinde «Umerov davasınıñ» esnasında nevbetteki mahkeme oturışında İlmi Umerovnıñ ATR telekanalında 2016 senesi martnıñ 19-nda yapqan çıqışınıñ video-yazısı seyir etildi. «Umerov davasınıñ» nevbetteki toplaşuvı iyünniñ 19-na saat 14:30 tayin etilgen.

İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.

XS
SM
MD
LG