Qırım Muhtar Cumhuriyetinde Ukraina prezidenti Temsilciliginiñ yolbaşçısına qarşı Hersonda narazılıq mitingini keçirgenler öz aktsiyasını müddetsiz olaraq ilân etti ve «Qırım suallerinde Cemaat Keñeşini» tizdi. Bu birleşme tarafından Ukraina prezidenti Petro Poroşenkoğa ve Qırımtatar Milliy Meclis reisi Refat Çubarovnıñ adına muracaat yollanıldı.
«Asker» cemaat birleşmesiniñ yolbaşçı muavini Evelina Arifova Qırım.Aqiqatqa bergen izaatında böyle ayttı: «Failler Ukraina prezidentiniñ Qırımdaki Temsilciligi binası qarışısında gece-kündüz bekçilik yapacaq, aktsiya müddetsiz devam etecek. Bütün talaplarımız yerine ketirilecegine qadar failler bu yerde olacaq».
Bundan da ğayrı o Qırım.Aqiqatqa Cemaat Keñeşi tarafından yollanılğan muracaatnıñ nushasını teslim etti.
«Qırım Muhtar Cumhuriyetiniñ suallerinde esas devlet organı – Ukraina prezidentiniñ Qırımdaki Daimiy Temsilciligidir. Prezidentniñ Daimiy Temsilciligi – şimdilik Qırım Muhtar Cumhuriyetiniñ suallerinen oğraşqan yekâne devlet konstitutsion organı olmaqta; Ukraina Konstitutsiyasına binaen, onıñ vazifeleri – Qırım Muhtar Cumhuriyetine dair Prezidentniñ, Ukraina Yuqarı Radasınıñ ve Ukraina Nazirler Şurasınıñ fermanlarına riayet etmek ve olarnı amelge keçirilmek, işğal etilgen topraqlarda vatandaşlarnıñ aqlarını ve üriyetini qorumaqnen bağlı devlet siyasetini kerçekleştirmek», – dep aytıla muracaatta.
Bunen beraber vesiqada aytıla ki, QM Cumhuriyetinde prezidentniñ DT yolbaşçısı vazifesine Natalya Popoviç tain etilgen soñ, munasip ukrain qanunları bu organ tarafından eda etilmey ve körmemezlikke urıla.
«Bundan da ğayrı, Qırım Muhtar Cumhuriyetinde Prezidentniñ daimiy temsilcisi kütleviy haber vastalarınen israrlıqnen ve kesinliknen alâqadar olmay, Qırım problemlerinen bağlı merasimlerde iştirak etmey, Qırımtatar Milliy Meclisini (cemaat teşkilâtı olaraq tanıp) qırımtatar halqınıñ temsil organı olaraq qabul etmey», – dep aytıla yañı keñeşniñ muracaatında.
Bu munasebetnen failler Çubarovğa ve Poroşenkoğa «doğrudan-doğru Ukraina prezidentine bağlı olıp, kontrolsiz öz vazifelerinden çetleşken devlet strukturasında olğan vaziyetke devletniñ cevabını bermege» rica etti.
Muracaatnıñ metini astında «Cemaat Keñeşiniñ» azaları – «ATO veteranlarınıñ cemiyeti», «Avtomaydan Kyiv», «Dostoinstvo», «Asker», «Vatanperverlik yetekçileriniñ azırlav merkezi», «Kiborgi Polissâ» cemaat teşkilâtları ve birlikleri olğanı aytıla.
İyülniñ 10-nda Hersonda «Asker» cemaat birleşmesiniñ vekilleri, «Aydar» batalyonınıñ evelki askerleri, «Avtomaydan» failleri Ukraina prezidentiniñ Qırımdaki temsilciliginiñ Hersonda yerleşken binası qarşısında miting ötkerdiler. Narazıcılar QM Cumhuriyetinde prezidentniñ Daimiy Temsilciliginiñ yolbaşçısı Natalya Popoviçni vazifesinden boşatmağa talap ete.
Öz nevbetinde, Qırım Muhtar Cumhuriyetinde Ukraina prezidentiniñ temsilcisi Natalya Popoviç Qırım.Aqiqatqa izaat berip, Hersonda temsilcilik binası qarşısında mitingniñ keçirilmesini «yarımadanıñ azat etilmesine qarşı isyan» dep tanıttı.
2017 senesi mayısta, qırımtatar halqınıñ genotsidi qurbanlarınıñ hatırasına keçirilgen matem tedbiri devamında «Qırım Muhtar Cumhuriyetinde Ukraina prezidenti temsilciliginiñ idaresini deral deñiştirmek» talapları seslendirilgen edi. Bütün Dünya Qırımtatar Kongressiniñ icra şura azası Lenur İslâmov o vaqıt, Popoviçni işinden boşatıp, onıñ vazifesine «qırımtatarını tain etmege» kerek olğanını aytqan edi.
