Aqyar memuriyeti yolbaşçısınıñ vazifesini eda etken Dmitriy Ovsânnikov, iyülniñ 10-nda Aqyar-Aqmescit yolunıñ qazaiy qısımını nezaret etkende, Qırımda yollarnı «keyfiyetli tamir» etmek içün maden yetişmegenini beyan etti. Şeer yolbaşçısnıñ sözlerine köre, bunıñ sebebi Keriç köpüriniñ qurucılığınen bağlı.
«Yarımadada maden yetişmemezligine rast keldik – onıñ aman-aman bütüni Qırım köpürüniñ qurucılığına sarf etile. (Rusiye – QA) Naqliyat nazirliginiñ destegi sayesinde biz kerekli yardımnı ve vaqıtında ketirilgen malzemelerni qullana bilemiz», – degen Ovsânnikovnıñ sözlerini şeerdeki Rus memuriyetiniñ matbuat hızmeti derc etti.
Onıñ bergen vadesine köre, yolnıñ tamiri iyülniñ 31-ne qadar yekünlenecek.
Martnıñ başında Aqyar-Aqmescit yolunıñ bir qısımı yer köçüvi sebebinden eşilgen edi. Aqyar akimiyeti şeerde fevqulâde vaziyet ilân etip, yengil maşnalar, avtobuslar ve yük maşnaları içün aylanma yolunı açqan edi.
Yolnıñ bu qısımını tamir etmek içün 70 million ruble (33 million grivnadan ziyade – QA) miqdarında sermiya ayırılğan. Albu ki işlerni eda etken teşkilât ile tizilgen añlaşma ancaq 25 million rubleni (tahminen 11 mln. 900 biñ grivnanı – QA) teşkil ete.
