Link açıqlığı

Sudaqta şeer memuriyet yolbaşçısınıñ vazifesini eda etecek memur tayinlendi


Sudaq şeer memuriyeti yolbaşçısınıñ vazifesini eda etken Emirsali Ablâlimov

Kremlniñ nezaretindeki Sudaq şeer şurasınıñ toplaşuvında iyülniñ 10-nda deputatlar, şeer memuriyetiniñ yolbaşçısı vazifesine Emirsali Ablâlimovnıñ namzetini bir ağızdan destekledi. Sutaqnıñ resmiy sitesinde bildirile ki, bundan evel Ablâlimov şeer memuriyeti yolbaşçısınıñ muavini vazifesinde çalışqan.

«Emirsali Ablâlimov memuriyet yolbaşçısı vazifeni eda etecek ve soñra bu vazifege keçecek», – dep aytıla bildirüvde.

Matbuat hızmetinde haber eteler ki, aynı künü toplaşuv devamında memuriyet yolbaşçısı Vladimir Serovnıñ müddetinden evel vazifeden çetleşmesi de muzakere etilgen.

Kremlniñ nezaretindeki Qırım parlamenti iyülniñ 7-nde Boris Ziminni baş nazir muavini vazifesinden boşattı ve onıñ yerine Sudaqtaki Rus memuriyetiniñ sabıq yolbaşçısı Vladimir Serovnı tainlegen.

Serovnıñ sözlerine köre, yañı vazifesinde o, Qırım yolbaşçısı Sergey Aksönovnıñ emiri ile, Yalta ve Sudaqnen bağlı suallernı idare etecek.

Emirsali Ablâlimov 1998-2002 seneleri devamında Sudaq prokuraturasınıñ taqiqatçısı edi, 2002-2003 seneleri – Sudaq şeer yolbaşçısınıñ muavili olğan. 2003 senesinden başlap Sudaq şeeriniñ prokuror muavini ve prokuror vazifelerinde çalışqan. 2006 senesi aprel ayında Sudaq şeer şurasınıñ icraiy organlarnıñ işinen bağlı sualler boyunca şeer yolbaşçısınıñ muavini vazifesine tain etilgen edi.

XS
SM
MD
LG