Birleşken Milletler Baş Assambleyasınıñ nevbetteki toplaşuvı içün Ukaina tarafından bir sıra teşebbüsler azırlanıla, olarnıñ bazıları Qırımnıñ işğalden azat etilmesi mevzusınen bağlı olacaq. Bunı iyülniñ 11-nde «Vaşa Svoboda» («Azatlığıñız») programmasınıñ efirinde Ukraina Prezident idaresiniñ yolbaşçı muavini Kostântın Yeliseyev bildirdi.
«Ayrıca, Qırım meselesine kelgende: Qırımnıñ işğalden azat etilmesine dair yañı ğayeler aqqında söz kete. Endi bar olğan halqara mehanizmler ve sanktsiyalar qullanılıp, Qırımnı endi artıq ukrain qanuniyetine qaytarmaq içün areket yapılmalı. Bizler şimdi BMT Baş Assambleyasnıñ toplaşuvına azırlanamız. Ukraina BMT çerçivesinde bazı teşebbüslernen çıqacaq ve olar hususan Qırımnen, onıñ azat etilmesinen bağlı olacaq», – dedi Yeliseyev.
O dedi ki, Qırım ve Donbass meseleleri – halqara ortaqlarnen ötkerilgen muzakerelerde «alfa ve omega» (başı ve soñu) ola.
BMT Baş Assambleyasnıñ nevbetteki toplaşuvı sentâbrniñ 12-nde işini başlamaq kerek.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
