Link açıqlığı

Rusiye: Tataristan parlamenti Putinni vekâletlerniñ sıñırlarına dair añlaşmanı uzatmağa rica ete


Putinniñ adına muracaatnıñ metini salonda olğan bütün 83 deputat tarafından desteklendi

Rusiyede iyülniñ 11-nde Tataristan parlamentiniñ deputatları prezident Vladimir Putinge muracaat etip, Qazan ve Moskva arasında vekâletlerniñ sıñırları aqqında añlaşmanıñ müddetini uzatmağa teklif ettiler. Bunı Radio Svobodanıñ leyhası olğan Idel.Aqiqat haber ete.

«Yedinaya Rossiyanıñ» deputatı Nikolay Rıbuşkin parlament toplaşuvında beyan etti ki, añlaşmanıñ müddeti uzatılmasa, Federatsiyanıñ merkezi ve region arasındaki munasebetlerde «uquqiy boşluq» peyda olacaq. Bunen beraber, onıñ sözlerine köre, Tataristan Konstitutsiyasınıñ eñ azından 14 maddesine, em de bir sıra Rusiye qanunlarına deñişmeler kirsetilmek kerek olacaq. O dedi ki, añlaşma müddetiniñ uzatılmasını «bizden eali bekley».

İyülniñ 11-nde parlament toplaşuvında iştirak etken 83 deputatnıñ episi Nikolay Rıbuşkinniñ teklif etken muracaat leyhasını destekledi. Onen deputatlar ayrıca Tataristan yolbaşçısnıñ unvanını deñişmesiz qaldırmağa rica eteler.

Rusiye ve Tataristan prezidentleri Vladimir Putin ve Mintimer Şaymiyev 2007 senesi iyünniñ 27-nde mahsus añlaşma imzalap, federal merkez ve region arasında vekâletlerniñ sıñırlarını belgiledi.

İyülniñ 24-nde Federatsiyanıñ merkezi ve Tataristan arasında vekâletlerni tertiplegen on yıllıq añlaşmanıñ müddeti soñuna kele. Tataristan Devlet Şurasınıñ yolbaşçısı Farid Muhametşinniñ sözlerine köre, añlaşmanıñ müddeti 2017 senesi avgustnıñ 11-nde soñuna kelecek, çünki mezkür añlaşma on yıl evelsi o künü küçüni alğan edi.

XS
SM
MD
LG