Link açıqlığı

Qırımtatar milliy areketiniñ yetekçilerinden biri Ahtem Çiygoznıñ advokatı Nikolay Polozov, onıñ müşterisi endi avgust ayında mahkeme qararınen mahküm etile bilecegini tüşüne. O vaqıtqa qadar şaatlarnıñ sorğulanması, delillerniñ taqdim etilmesi ve taraflarnıñ tartışmaları yekünlenecektir. Bunı Nikolay Polozov iyülniñ 11-nde, «Çiygoz davasınıñ» nevbetteki, 140-ncı mahkeme toplaşuvında teneffüs ilân etilgende bildirdi.

«Ceryannıñ ketişatına baqıp, kelecek afta, ya da daa bir afta soñra, imayeciler tarafından bütün qalğan yazılı deliller taqdim etilecegini añlayım. İmayeniñ köstermege istegeni soñki delil – Ahtem Çiygoznıñ sorğusı olacaqtır. Bundan soñ daa bazı ilâveler olur, belki prokuratura tarafından bazı deliller kösterilir. Ve bundan soñ bizler tartışmalarğa keçermiz. Böyle etip, mahkeme esnasında ya iyülniñ soñunda, ya da avgustnıñ başında munaqaşalar keçirilip, bundan soñ mahkeme öz qararını alacağını tüşünem», – dedi Polozov.

İyülniñ 11-nde «Çiygoz davasınıñ» mahkeme oturışında Kremlniñ nezaretindeki Qırım parlamentiniñ deputatı Lentun Bezaziyev sorğudan keçe, onıñ çağırılmasını imaye tarafı talap etti.

Kelecek afta Kremlniñ nezaretindeki Qırım parlamentiniñ yolbaşçısı Vladimir Konstantinov «Çiygoz davasında» öz ifadelerini seslendirecegi beklenile.

Kreml kontrol etken işğal altındaki Qırımnıñ Yuqarı mahkemesi iyünniñ 22-de Ahtem Çiygoznıñ apiste yatma müddetini üç ayğa – oktâbrniñ 8-ne qadar uzattı. Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG