Aqmescitte Kozlov soqağında yoq etilgen kiçik bazarnıñ yerinde terekler saçılıp başlandı. Rusiyeli şeher mamuriyetiniñ matbuat hızmetiniñ bergen malümatına köre, yerniñ abadanlaştırılması devamında nevbetteki adımnen yarıq fenerleri qoyulacaq.
Şeer yolbaşçısınıñ birinci muavini Aleksandr Ovdiyenko: «Rekonstruktsiyanıñ birinci qısımını yekünleymiz, esas işler yapıldı: eşilmeceq taşlarden yolaqlar töşeldi, elektroteller ve suvarmaq içün tamçılar sisteması quruldı, yarıq tiremelerniñ qoyulması içün azırlıq yapıla. Şimdiki qısımda yeşilletüv başlandı, mutehassıslar sedr fidanlarını saça, aynı zamanda ot ösümliklerini saçılmaq içün azırlıq alıp barıla», – dep, esabat berdi.
Aprel 11 künü Aqmescitte akimiyet Kozlov soqağında kiçik bazarnıñ binaları küçnen yoq etilgen edi.
Yoq etilgen kiçik bazarnıñ yerinde parkovka qurılması ve oyerniñ abadanlaştırılması vade etilgen edi.
Aprel 25 künü şeer memuriyetiniñ sitesinde, aprel 11 künü Aqmescitniñ merkeziy bazarı yanında yoq etilgen satış noqtalarnıñ yanında avtoparkovka qurulmacağı haber etildi.
Memuriyetiniñ rusiyeli yolbaşçısı Gennadiy Baharevniñ sözlerine köre, şeher akimiyetiniñ planlarında – Kozlov soqağında yolnı keñişletmek, etrafnıñ abadanlaştırılması, qaldırım yolağınıñ taşlarnen töşelmesi ve tereklerniñ saçılması bar.
